政情：發叔棄連任鄉局主席
新界鄉議局下月一日就換屆，年屆七十九歲嘅主席劉皇發（發叔）率先宣布唔再角逐連任。發叔尋日去信鄉議局全體議員及顧問，話有感年事已高，經慎重考慮後，決定不再尋求競選連任，仲懇切期望有志之士當仁不讓，踴躍參選，帶領鄉議局為鄉民福祉、為香港嘅穩定繁榮，作出更大貢獻。據了解，鄉議局副主席張學明及林偉強將會連任，扶助發叔「太子」劉業強（Kenneth）繼承「新界王」之位。
料立會議席亦傳業強
人稱「新界王」嘅發叔喺信函表示，自一九八○年獲選為第二十四屆鄉議局主席，承蒙鄉議局仝人信任有加，鼎力支持，多番連任至今已任職主席達三十五年，因此係時候退下火線咁話。據了解，發叔身體近年不復當年勇，雖然平日開會依然中氣十足，相當精靈，但上星期的確因為身體唔舒服一度入院，更加令佢以健康為由退任嘅傳聞甚囂塵上。
據知發叔決定退任後，已經陸續約見二十七鄉嘅鄉頭，希望佢哋睇在自己份上，喺鄉議局事務上扶Kenneth一把，鄉紳亦估計發叔長遠會將其立法會鄉議局功能界別議席交棒畀Kenneth。發叔尋日未有現身立法會，但就報咗名參加星期日嘅深圳晤京官討論政改會議。我哋分別多次致電發叔父子，但始終未能聯絡上。
另鼓勵有志之士競逐
事實上，年事已高嘅發叔早於前年已經將全國政協委員之位交棒畀Kenneth，慢慢扶植佢主持大局。而Kenneth亦接掌負責鄉議局大樓嘅管理，大小活動都頻頻亮相擔任主持。發叔表面上鼓勵「有志之士」踴躍報名競逐主席之位，但由於唔少鄉紳仍然好撐發叔，早前二十七鄉更聯署支持發叔連任，加上距離選舉截止報名只係淨番兩日，「有志之士」就算呢個時候想角逐都未必趕得切搵齊啲鄉頭支持啦。