中環出更：聚少離多 「遠澄戀」閃分
香港社運圈孕育出唔少情侶，但最終能夠開花結果嘅就唔算多。社民連副主席吳文遠與「民主小女神」周澄去年公開戀情後，曾成為社運圈子熱話，有網民更催促兩人早日結婚，女方更赴英國出席吳文遠胞弟嘅婚禮。正當大家都以為兩人好事近之際，卓妮就收到爆料，原來呢段戀情已悄悄地結束咗。
拍拖不足一年
吳文遠與周澄初初拍拖時，經常將甜蜜合照放上網「放閃」，當時外界都有人睇好呢段感情，覺得兩人政治取態相近，應該好快可以拉埋天窗。不過，去年底周澄要遠赴英國深造，吳文遠則要留守香港參與佔領行動，結果兩人拍拖無耐就要分隔兩地展開異地戀，就算吳文遠不時飛去英國「蜜會」周澄，仍然聚少離多。有確實消息話，兩人於年初已經分手，閃電結束不足一年嘅戀情。
到底兩人點解分手，仍然係個謎。卓妮嘗試聯絡吳文遠，但未能成功。而周澄喺社交網站仍然好活躍，最近就去咗瑞士度假，並上載多張與友人嘅合照，表面睇嚟似乎並無因為「甩拖」而影響心情。其實政治與愛情一樣，離離合合好正常，兩人雖然已分手，但相信仍然係社運路上嘅戰友。
卓妮