中環出更：女企業家資助基層童升學
撐起半邊天嘅叻女愈來愈多，為薪火相傳，金紫荊女企業家協會（下稱「協會」）主席彭芷君（GiGi）就計劃成立獎學金，協助來自低收入家庭嘅品學兼優女生，一圓升學夢。協會日前舉行第二屆執委就職禮，港協暨奧委會秘書長彭沖嘅女兒GiGi接棒任新主席，上任頭炮就係宣布成立慈善基金。
GiGi笑言，唔使出手揼老友心口，好友已爭相認捐，基金成立後，將撥筆錢做獎學金。
彭芷君錫婚 執委姊妹送大禮
講完大計，成班執委姊妹拉GiGi上台，常務副主席馬天惠預備一份大禮，叫埋GiGi嘅心肺外科專科醫生丈夫辛光耀企到台前搞乜咁開心？原來係提早慶祝GiGi結婚十周年（錫婚）。辛醫生好怕醜，但喺眾人催促下，當面錫啖太太做禮物，認真甜蜜。
同場仲有喜運佳鐘錶集團主席蔡加讚（Karson），講起零售市道冷清清，Karson都皺晒眉，佢話香港部分人發起反水貨客行動，令來港嘅內地豪客銳減；加上歐元同日圓紙水低，去歐日購物，抵過香港多多聲。
今個五一長假期，Karson旗下香港店舖生意下跌兩成，澳門市況就好少少，但仍跌五個百分點。市況咁靜，佢話只好努力Call客、開源節流，希望遲啲市道有好轉喎。
卓妮