聲氣差冇耐性 鬧走良緣
【本報訊】廿九歲的秘書Christine，廿多歲才首次談戀愛，亦是至今唯一一次。「屋企人細細個就灌輸觀念畀我，要讀完先（可拍拖），讀完書又覺得未遇到。」她靦覥地透露已經歷兩年「空窗期」，雖揚言不怕做「剩女」，但總有點心理壓力：「之前其實都唔急，但年紀愈大就愈感覺唔好，三十歲係一個關口，見到有啲朋友結婚、生BB，自己都開始憧憬婚姻生活，搞到有啲心急。」她說，擇偶最重要合眼緣，價值觀相近，也不抗拒修讀課程，學習跟伴侶相處之道。
她的朋友、廿八歲的Rachel戀愛經驗較豐富，曾拍拖五次，但坦言同樣面對與伴侶相處上的問題：「普遍港女通病囉，聲氣都幾差，冇乜耐性，好易忟憎，鬧交時成日go furious（狂怒），有兩次拍拖都因為咁而散。」經過反省，她自言跟現任男友相處時，懂得「睇開啲，畀啲面男朋友，鬧交時一句說話轉個方式講就冇事。」但她不急於結婚，指遇上適合對象便順其自然。