揭剩女三成因 助覓歡
「盛女」及「沒女」等真人騷節目，一度成為不少八卦男女茶餘飯後的話題，也有人冀從中借鏡，助己擺脫單身宿命。婚姻介紹專家指本港剩女問題，歸根究柢與怪獸家長太多，向子女灌輸「讀書勝過一切」的錯誤價值觀，結果浪費了青春向上爬，錯過了享受戀愛機會，讀得書多職位高又嚇怕了異性不敢埋身，到了想結婚時還不肯放下身段左挑右揀，人老珠黃時還怨東怨西，最終變剩女。
婚姻介紹所創辦人吳美玲點評本港單身女性不婚之謎，包括存在「家教錯」、「露鋒芒」與「心頭高」三大問題。「香港好多家庭家教有問題，自細催谷啲仔女讀書，灌輸『讀書勝過一切』嘅價值觀，但證書係虛銜，讀完晒都老啦。」她指，許多家長禁止子女求學階段拍拖，致他們缺乏戀愛經驗，長大後覓得工時長的「高薪厚職」，幾乎「賣身畀公司」，最終婚期愈推愈遲。
職訓局開辦改善關係課程
吳美玲又說，不少港女鋒芒太露，結果嚇怕異性。「好多高學歷女仔，習慣將重點擺喺張卡片度，話『我係某某大公司總裁』，但男人心靈好弱小，受唔住呢啲光芒，亦唔想返到屋企仲要畀老婆挑戰。」
而最致命的是，高學歷的港女喜歡「吊高嚟賣」，「唔識煮飯，仲引以為傲，話唔使識因為有工人」，吳美玲笑指「如果係咁不如娶工人好過娶你啦。」她奉勸港女要做做「功課」，知道自己的優點和缺點，「覺得自己太肥咪減肥囉，否則人哋見到你都掉頭走；脾氣唔好嘅，咪諗吓點樣同人傾吓做吓輔導改善一下。」想結婚最緊要「快」，放下無謂矜持，切忌左挑右揀，「成日諗住要搵個好啲，亦唔好幻想男朋友一定會送花送朱古力咁浪漫」，集中選擇一個適合自己的人才實際。
職業訓練局轄下的高峰進修學院，開辦了「改善伴侶關係的個人提升課程」，內容由改善外表儀容，社交溝通技巧，到保持幸福關係的方法都有涉獵，開辦十個月以來，已有約一百二十人報讀。