如果問大家，近年香港喺資訊科技方面究竟有乜成果？睇怕十個有九個都諗唔到。咁又難怪嘅，香港科技產業乏善可陳，人才嚴重短缺，莫講話喺亞洲四小龍包尾，連內地城市都遠遠不如，確實好難諗到有乜科技成果。
係人都知，資訊時代最重要嘅資源係人才，有人才就有競爭力，否則講乜都係假。香港科技產業之所以不成氣候，主要就係因為人才短缺，加上缺乏政府支援，社會氛圍又唔配合，喺咁嘅情況下，競爭力點可能唔節節後退吖。
呢，有跨國電腦保安公司高層大吐苦水，話IT界好難請人，尤其係電腦保安人才最渴市，就算好彩遇到心儀人選，亦往往因為薪金叫價過高而令中小企卻步。至於其他IT職位，一樣唔易請人，有大型會計師行想請電腦程式員，結果因為應徵者質素參差，有啲連最基本嘅資歷要求都達唔到，根本揀唔落手。有僱主更直指本港年輕人「又Hea又懶」，反觀內地人才夠勤力又搏殺，簡直不可相提並論。
講起真係醜怪，香港自稱擁有亞洲一流學府，但就培養唔出IT人才，你話奇唔奇吖？歸根究柢，都係因為港府鼠目寸光，獨沽一味，以為金融業可以養活全香港，搞到百業凋零，經濟轉型停步不前，創新科技紙上談兵。連多間大學校長都睇唔過眼，多次批評港府短視，對大學科研投入少之又少，咁多間院校夾埋嘅資助連內地一間大學都不如，簡直令人難以相信。
點樣解決人才荒？有學者話喎，深圳係人才庫，加上兩地關係密切，不妨考慮吸納當地專才來港。唉，講就易咯，香港有咩條件吸引人才吖。港府話就話推出多項輸入人才計劃，甚至要吸引海外移民第二代回流添，可惜得個講字，香港產業結構單調，創新產業得啖笑，就算有人才肯來，都未必有用武之地喇。嗱，中國社科院公布嘅最新城市競爭力報告，香港保持咗十二年嘅綜合競爭力一哥地位不保，深圳後來居上，證明人哋嘅競爭力高過香港，有人才都留畀自己用喇。一句講晒，香港連梧桐樹都冇棵，根本冇可能吸引到鳳凰。
再講喇，香港社會愈來愈政治化，成日嘈喧巴閉，永無寧日，係人見到都怕怕，點肯自動獻身吖。所以話，面係人哋畀，架係自己丟，香港繼續糾纏於政治爭拗，不思進取，只會不斷沉淪咋。最怕低處未算低，今日香港畀深圳超越，過多幾年隨時連前十名都冇份，到時唔慌唔失禮咯！