政情：公民講場：普選無效？ 倒米「佳」句

出任中央政策組首席顧問時經常幫政府「倒米」嘅劉兆佳，尋日出席一個《基本法》研討會時重操故業。佢首先話支持同反對政改嘅民意都相當穩定同堅實，加上冇意見嘅市民比例唔高，故出現壓倒性民意支持政改嘅機會好微。跟住佢又話，泛民拒絕接受《基本法》同中央權威，喺短期內都冇可能執政，同老董嘅反共就冇得做特首言論一樣咁趕客。佳叔最後仲指出，無論特首選舉係真普選定假普選，其選舉結果都僅屬「參考材料」，並冇最終嘅「有效性」，只有中央嘅任命權先係「實質」。短短一日內三度幫政府同政改「倒米」，真係功力少啲都唔得！