政情：保守黨大勝 林建康睇好英國地產
近排香港股市當炒，不過唔係個個都追貨入市，愛沙尼共和國駐港名譽領事林建康（Matthew），就對英國地產市道睇高一線。事關保守黨喺啱啱結束嘅國會大選中勝出，令徵收房產稅嘅陰霾一掃而空，加上早排安然度過蘇格蘭獨立公投嘅危機，所以Matthew認為，未來半年當地房價將會快步上升。
投票當日好擔心
Matthew一向鍾情房地產投資，涉足英國地產已有超過二十年經驗。
早幾日佢同太太林黃寧艷一齊出席一個活動時話，年幾前英國地產價格曾經急升，後來大選將屆，唔少負面接連而出，包括工黨主張徵收房產稅，令房價升勢停晒。
投票當日佢好擔心，一直密切留意，結果保守黨大贏，成個人安樂晒。
Matthew話，英國安然度過幾個風浪，不穩定因素已消失，加上全球資金始終要搵出路，投資者不妨留意吓英倫地產前景。