政情：泛民做一世毒男

擺范冰冰 鍾嘉欣上枱

咁啱有「AV仁」之稱嘅民主黨（白鴿黨）立法會議員何俊仁尋日接受電台節目訪問，承認社會近兩、三個月都係聚焦討論政改，對辭職公投表現冷淡，所以佢哋前幾日宣布暫緩發動辭職公投，因為要爭取民意。佢死撐話，如果要白鴿黨接受低於國際標準嘅方案，就等同叫佢哋投降喎！睇怕鍾意睇AV嘅AV仁，都要做毒男喇！

話說尋日公聽會共舉行六小時，聽取約一百二十位市民及團體對政改方案嘅意見。朝早會議都係支持通過政改嘅意見比較多，到下午最後一節會議先至多啲後生仔表達反對聲音。而過往多次以唔同名義派代表出席公聽會嘅泛民政黨，今次就影都冇。

公聽會上有唔少趣事。自稱任職教師嘅香港培青社主席陳志興就質疑，泛民否決政改只係為咗可以一直爭取「真普選」，又以「娶老婆」比喻普選︰「如果娶老婆非范冰冰、鍾嘉欣不娶，就成世娶唔到，做一世毒男啦！」

「A貨林鄭」公聽會爆粗

亦有反對通過政改嘅後生仔玩扮嘢，扮埋「政改三人組」，造型幾搞笑。有人男扮女裝話自己係「政改奸人組成員林鄭月娥」，亦有人戴上光頭頭套扮「特衰政府政制及內地事務局局長譚志源」。不過「A貨林鄭」喺發言時揶揄涉毆打佔領行動示威者嘅七名警員「幾X勇武」，因為爆粗而被趕離場。

亦有自稱係「研究如何使用俚語叫六八九收皮」團體成員嘅少女，向政制及內地事務局副局長劉江華「示愛」，話好鍾意「江華BB」，因為林鄭成日廢噏，佢都可以成個垃圾桶咁喺隔籬唔出聲，呢位少女好「仰慕」，話想搵個咁嘅男友咁話。