中環出更：國酒開幕禮 鬍鬚曾冇飲茅台
一向識飲識食嘅財政司司長曾俊華（鬍鬚曾），尋日去鯉魚門出席國酒茅台海鮮節嘅開幕典禮，活動講到明主打飲茅台、食海鮮，不過鬍鬚曾到場後就一啖茅台都無飲過，儀式結束後即匆匆閃人。前特首「貪曾」曾蔭權爵士同前廉政專員「貪湯」湯顯明都出咗名鍾情飲茅台，仲會買嚟送禮，唔知鬍鬚曾係咪怕惹禍上身，所以滴酒不沾呢？
連望吓都唔敢 做快閃黨
出席開幕典禮嘅仲有香港旅遊發展局總幹事劉鎮漢、旅遊事務專員朱曼玲等人，鬍鬚曾致辭嗰陣，講到本港三月份旅客數字按年下跌百分之八點七，雖然四月數字升番些少，但係佢都好擔心，借機預告第二波促銷行動「香港分享夏日禮」，將喺六至八月舉行，屆時會大搞購物優惠吸引顧客消費。鬍鬚曾致辭完、睇完舞獅後，即刻同劉鎮漢分頭走人，連望吓放埋一邊嘅茅台酒都唔敢。斷估係因為貪曾同貪湯「陀衰家」，所以官場中人好驚同佢哋扯上關係囉！
卓妮