中環出更：膠袋徵費 李運強瞓身撐環保
第二階段膠袋徵費上月實施後，做膠袋生意嘅企業可能隨時陷入冰河時期，咁做紙袋生意嘅咪會偷笑？尋日沙田馬場有賽事，卓妮見到理文造紙創辦人李運強即上前問個究竟，佢笑笑口話，近期紙袋訂單的確有唔錯增長。咪以為造紙等於伐木，李運強話，佢哋用嘅係環保造紙，唔怕嘥喎！
李運強話，自從實施膠袋徵費後，唔少企業都落柯打做紙袋，帶挈公司生意好好。大家以為用多咗紙袋更加唔環保，但李運強強調，造紙唔等於伐木，皆因佢哋主要用環保紙，或者比較粗生嘅竹漿做原材料，而唔係用樹漿造紙。
李少光夫婦 帶膠盒買餸
咁啱早幾日卓妮見到保安局前局長李少光夫婦，李少光都話，早於年前屋苑實施廢物分類時，兩夫婦已經身體力行支持。依家去街市買餸除咗帶環保袋，仲會帶定個膠盒方便隨時擺豆腐入盒，咁就一個膠袋都唔會浪費喇！
講返馬場尋日舉行十八區盃賽，約三百名各區政商界人士齊聚。馬會大董梁高美懿話，馬會去年起已經喺馬會設宴款待各區六十五歲以上長者，名為「社區萬歲宴」，除咗邀請長者到馬會食飯，長者又可以動吓腦筋買返兩手，政府仲有機會收多啲稅添！
卓妮轉頭見剛卸任青年事務委員會主席嘅觀塘區議會主席陳振彬（Bunny）及馬會大董李家祥好好傾，Bunny仲叫李家祥師兄！Bunny解釋，李家祥係九十年代嘅青年事務委員會主席，所以同樣明白年輕人諗乜喎！
卓妮