灣仔：為工程斬白蘭樹 老街坊不捨
「每逢呢度啲白蘭樹開花，成條街都會有一大陣清香，行過心情都靚啲，點解要斬咗佢？」灣仔老街坊葉女士指出，近金鐘段的皇后大道東原種有數株白蘭樹，惟近日因工程被移除，不滿當局有違保育宗旨，「成日都講話要環保，根本就係講一套就做一套！」
康署稱配合道路改善
康文署發言人證實，為配合道路改善工程，灣仔區議會發展、規劃及交通委員會支持涉事路段休憩處翻新工程，原計劃將七株樹木悉數移除，惟當局一二年審批時已將數目減少至四株，去年底承辦商曾種植小型觀賞喬木，惟因未能適應而枯萎，將另行補種合適樹種。
「好多街坊都鍾意白蘭花陣香味，嗰幾棵樹已經變咗做地標咁，一講其他人就明你講緊邊度。」葉女士認為樹木往往盛載居民集體回憶，要求當局日後再有工程，應盡可能爭取保留。