好嘅唔靈醜嘅靈，激進組織不斷叫囂「中國人滾回中國去」，搞到訪港旅客應聲急跌，市面冷冷清清，店舖門可羅雀，旅遊業正式步入寒冬，業界望天打卦。唔通呢啲就係反水客示威者想見到嘅結果？唔通呢啲就係「求仁得仁」？
嗱，「一簽多行」改為「一周一行」後，香港迎來首個慘淡嘅五一長假，往日熙熙攘攘嘅購物區人流大減，旅客寥寥無幾。銅鑼灣有商戶大吐苦水，指反水客示威連累生意額急跌七成，隨時要關門大吉。旺角亦唔好得去邊，有金舖負責人話，佔中後生意跌咗五成，依家要「蝕住做」，加上港幣升值，內地客紛紛轉去外國購物，就算業界推出「開心着數大行動」亦無濟於事；有藥房老闆同樣大呻生意難做，上月營業額跌至歷來最低，仲差過沙士，對五一長假完全無期望。
黃金周唔見黃金，其實一早預咗喇。旅遊業估計今年五一長假內地訪港團減少一成，可能仲係樂觀咗啲，實際情況可能更加慘淡。好簡單，往年五一口岸人流係「入多過出」，而今年就變成「出多過入」，即係話訪港旅客明顯比往年少咗，呢個趨勢睇怕短期內都好難改變。難為當局仲死撐，話五一長假首日內地客增加兩成幾喎，弊在呢個數字有唔少水分，從過夜客減少逾一成就知道形勢不妙，業界指最壞情況仲未出現，絕對唔係靠嚇。
正所謂，自作孽，不可活。香港不斷趕客，將內地人視為「蝗蟲」，反觀外國就打開大門，將中國旅客視為財神，招待唯恐不周，內地客點樣選擇，唔使講都知喇。淨係日本及韓國咋，今年三月中國旅客分別升咗一點五倍及兩成二。更弊嘅係，除咗激進組織趕客，香港時不時發生強迫購物醜聞，亦令旅客怕怕。呢，有位廣州旅客投訴，導遊威脅如果購物不足五、六千元，就唔准遊迪士尼樂園，甚至冇房住喎，問你怕未。
最好笑嘅係，「一簽多行」改為「一周一行」，原本想打擊水貨活動，吸引真正旅客，結果水貨活動並冇減少，搞到當局要繼續追殺水貨倉，而真正旅客又唔上門，簡直係兩頭唔到岸，弄巧反拙。不可不知，聲譽易毀難建，財神易送難請，香港個名已經臭晒，想旅客返轉頭都幾難。
唔好唔記得，內地多個省市先後成立自貿區，日前中央又宣布調減部分進口消費品關稅，內地人唔怕冇地方購買外國貨，香港優勢買少見少，莫講話鬧市商舖拍烏蠅，連邊境購物城都可以慳番，到時香港唔慌唔清淨咯！