政情：斯諾登案律師 為愛人留港
律政司一次過有多達四名政府律師獲委任為資深大律師（SC），在五大分科中人數最少嘅國際法律科，今年更首次有成員榮升SC，佢就係有份處理轟動全球嘅斯諾登案嘅副國際法律專員（司法互助）華偉思（Wayne）。
Wayne接受我哋訪問時透露，佢係新西蘭人，喺當地大學讀法律，但中途放棄學業，越洋來港做咗三年督察，之後先返家鄉完成法律學士課程。問佢點解最後又離鄉別井，重返香港加入前律政署做政府律師？佢話係為咗個「情」字。原來佢首度來港時遇上意中人，畢業後諗清諗楚，都係決定移居香港與愛人長相廝守，認真浪漫。但問佢喺斯諾登案中嘅角色，佢就話乜都唔講得喎。
許紹鼎曾是「校草」
其餘三名晉升SC嘅政府律師為副刑事檢控專員譚耀豪、梁卓然及高級助理刑事檢控專員許紹鼎。其中許紹鼎讀九龍華仁書院時係「校草」兼跨欄健將，大學畢業後加盟前律政署一做就廿年，到依家身形依然keep得好好。