政情：郭紹傑網上爆粗鬧仔
工聯會立法會議員王國興（阿王）上周日喺直播節目中，被學民思潮發言人黎汶洛質疑出賣工人權益後，隨即按捺不住兩度回敬對方「收皮啦！」結果被質疑講粗口，泛民主派更咬住唔放。點知另一基層工會代表、佔領行動期間喺金鐘佔領區擔任糾察長的工黨成員郭紹傑，就被發現喺社交網站上用粗口「你老Ｘ仲打機！唔瞓！」鬧阿仔，隨即引來議論紛紛，睇嚟泛民應該出動要求佢公開道歉嘞！
網友暗批 促應「身教」
郭紹傑尋日凌晨兩點幾鐘，喺社交網站上載咗一張兒子打機嘅相，並寫上「你老Ｘ仲打機！唔瞓！」，真係令人嘩然。雖然佢事後補飛，話仔女係佢嘅摯愛，仲自爆「自作孽」送遊戲機畀仔女，搞到佢哋玩到唔願瞓，但仍然吸引唔少朋友留言，例如：「同個仔溝通係要有耐性」、「身教重於言教」、「還是第一次見老竇咁樣笑自己仔女」、「我的經驗是想仔女好，就要做好自己」等，暗批佢唔應該用粗口鬧個仔。
曾被指「呃假去佔中」
其實個仔喺附近，做爸爸嘅大可以直接行去叫個仔唔好再打機，但佢就選擇放相上社交網站，唔知關唔關佢去年掛住佔領行動，唔得閒同個仔溝通呢？去年郭紹傑極積參與佔領行動，並喺金鐘佔領區擔任糾察長，壹傳媒集團前主席黎智英畀人淋屎掟豬雜時，佢亦有份制服涉案人士。
不過，如此「勇猛」嘅表現就令人質疑佢「扮傷呃假去佔中」，事關本身佢係港九拯溺員工會理事，被揭自去年九月因跌斷鎖骨申領工傷假，但就同時日日現身佔鐘區；其後亦被發現喺立法會打邊爐同喺佔領區明火打邊爐，惹來唔少批評。今次郭紹傑公然喺社交網站用粗口鬧個仔，除咗粗言穢語教壞小朋友，可能仲會令人關注父母點同仔女溝通，係咪嚴重過阿王句「收皮」好多呢？