中環出更：鄧忍光快閃 「自閹」發言機會
大專辯論賽總決賽尋日舉行，嶺南大學及理工大學就辯題「香港本土意識提升有利社會發展」對壘，辯題觸及本土議題固然惹火，但廣播處長鄧忍光同學生分享辯論經驗時更加火上加油，除咗呻立法會議員唔畀機會佢講嘢，仲話從來冇記者會畀佢講晒想講嘅嘢。不過，記者事後畀機會佢講嘢，但佢又一支箭咁快閃。
先前才呻記者唔畀機會講嘢
鄧忍光分享時自言公務員出身，淨係出席立法會會議同面對傳媒時先用得上辯論技巧。不過，佢先係呻立法會會議嘅發言時間得四分鐘，「議員會用三分五十九秒（發言），我得番一秒，永遠都冇機會」，要闡釋觀點、政策「應該出去同記者講」，「但唔好諗住講晒，因為你永遠都唔會講得晒」，更指控「從來冇一個記者係畀機會你講晒所有嘢」，若一個論點用詞清晰，咬字準確，已經好成功。
不過，最諷刺嘅係，鄧忍光頒獎後離開時面對記者追問，就一秒都唔肯留畀記者，喺職員陪同下直奔去座駕「快閃」。唔知係邊個唔畀機會邊個呢？辯論賽最後由反方嘅理工大學勝出奪冠，嶺南大學則屈居亞軍。
卓妮