中環出更：張華峰勁賺 妻依舊慳家
北水湧到，港股熱炒，帶挈立法會金融服務界議員張華峰（肥老闆）勁賺一筆。不過，張太依舊慳家，上周日下午同兩個女兒組成Shopping三人組，逛中環ifc名店，為趕及免費泊車優惠，張太使出一招「飛毛腿」，對腳以好似開咗摩打咁跑去「蓋」車飛。
一身「潮媽」打扮嘅張太，着上閃片Ｔ恤，配襯白色熱褲，再加對螢光波鞋，企埋兩個囡囡身邊，青春指數爆晒燈。
撇低囡囡狂奔「撲印」
張太咁潮，同囡囡行街當然無隔膜，三人沿途有講有笑，當行到去一間超市門口時，張太突然停低打開手袋搵嘢，原來係搵張停車場飛拎去蓋印，享免費泊車優惠。
張太望一望手錶，面露緊張神情，然後撇低兩個囡囡，極速跑向前方一個櫃位蓋印。卓妮上前打招呼，張太話，再唔跑快啲去蓋印就會過鐘喎。停車場時租都只係二十幾蚊，可能肥老闆食少條魚翅都喺番度，難得張太仲咁精打細算慳家，認真係賢內助。
查實肥老闆近期炒港交所（0388），賺到盤滿砵滿，有一次同記者食晏，即場分別以二百七十元及二百六十八元掃入合共十萬股港交所，以該股近日升至二百九十七元計，賬面已賺二百八十萬元。肥老闆都識做，早前舉家遊大阪睇櫻花，同家人開心吓。
卓妮