危險車房冇監管 都市炸彈不勝防

唔講唔知，全港車房多達二千幾間，但持有機電署發出准許更換石油氣車輛氣缸及喉管牌照嘅只有二十九間，今次發生爆炸嘅就係一間非持牌車房。試諗吓，包括的士、公共小巴、私家小巴在內，石油氣車輛超過二萬一千架，平均每間持牌車房要「招呼」七百幾架車，應接不暇，點可能唔甩甩漏漏呢？加上當局監管兒戲，車房質素良莠不齊，有人貪方便到非持牌車房更換氣缸，想唔出事都幾難。

最大嘅危機係，好多車房位於舊區，貼近民居，好似土瓜灣、牛頭角、大角咀、深水埗、柴灣等區，閒閒地有幾十間車房，成行成市，七國咁亂。呢，本報記者明查暗訪發現，唔少車房缺乏管理，安全意識薄弱，雜物又多又亂，有啲堆到天花板咁高，連危險品都隨地亂放。仲有吖，好多車房完全見唔到「嚴禁吸煙」一類安全警示，員工唔單止將風煤樽擺放店外，而且喺隔籬煲煙，睇見都牙煙。業界人士承認，一般車房缺乏完善嘅通風設備及漏氣警報系統，加上有人不依程序維修，埋下安全隱患，成為都市炸彈。

對於呢啲車房亂象，機電署又點解釋呢？佢哋話喎，一直有巡查石油氣車輛維修工場，而過去兩年亦巡查過一般車房約五百次，前年曾經「成功」檢控一宗違規維修石油氣車輛個案。喂，危險車房遍地開花，違規維修石油氣車輛問題嚴重，咁多年至有一宗成功檢控個案，擺明係失職喇。

正如有立法會議員話齋，今次爆炸事件凸顯機電署對石油氣維修車房監管不足，標準亦十分模糊，當局應盡快制訂清晰指引，加強巡查，嚴格杜絕違規維修石油氣車輛。除此之外，新發展區難以容納汽車維修工業，導致車房過度集中喺舊區，亦係一個好大嘅問題，有人建議當局研究發展汽車城，將車房搬離民居，集中管理，唔係冇理由。正所謂，與其揚湯止沸，不如釜底抽薪，車房貼近民居，始終係一個計時炸彈，再唔諗辦法解決，遲早又爆大鑊嘅咋。

天災難防，人禍可免，今次爆炸慘劇話就話係意外，實際上係人禍引起，當局監管不力絕對難辭其咎。總而言之，車房問題多多，危機重重，點樣亡羊補牢，防止慘劇重演，係港產官僚不可推卸嘅責任，千祈唔好又側側膊吖！