政情：霍家低調 啟山唔使保鏢

富商千金被綁架成為全城熱話，身為港協暨奧委會會長霍震霆嘅二公子霍啟山尋日出席活動時，對綁架事件似乎唔多擔心，事關霍家好低調，所以冇諗過加強保安問題，仲講笑話有咁多記者喺度，佢去邊度都有人知道喎。不過，啟山經常中港兩邊走，真係唔使請保鏢？佢就話唔使請，自己亦唔識功夫，但足球腳法都幾好o架，仲趁機宣傳嚟緊香港青年足球總會有個十八區足球比賽，叫大家支持吓喎。