嶺南大學學生會早前舉辦「黑暗時代抗爭」校園音樂會，期間有樂隊唱粗口歌辱罵警察，引起各界批評。繼行政會議成員、嶺大校董會前主席陳智思就事件向公眾致歉後，嶺大校長鄭國漢尋日亦向職員、校友及學生發電郵，就事件向公眾及受影響人士致以衷心歉意。
不過，鄭國漢同時對事件表達失望及憤慨，憂慮事件對嶺大學生造成不良影響，令嶺大聲譽受損。
鄭國漢話，校方已明確要求嶺大學生會絕對不能再有同類事件發生，亦已去函學生會警誡勿再重犯，否則校方會作出紀律處分。佢強調嶺大尊重不同形式嘅表達意見自由及權利，所以不會事先審查活動內容，但有關人士亦要對個人言論及宣示嘅訊息及內容負責。
鄭國漢又話，事件發生一個多星期以來，校方一直全力跟進，包括成立專責委員會調查及撰寫報告，約見學生會代表，並在校董會討論，以決定事件嘅處理。