政情：冇份落區 田少酸溜溜

質疑團體選戰前乘機自銷

二○一七年特首普選方案上周三公布後，港府高官隨即落區推銷政改，本周一開始一連多日，分早上、中午及傍晚放工三個時段輪流落區同市民接觸，大多數時間都有民建聯、工聯會等建制政黨政團代表陪同。不過，同政府早有牙齒印嘅自由黨就榜上無名，呢個係繼政府司局長前年集體杯葛自由黨二十周年黨慶後，另一明顯政治動作，令人懷疑該黨過去嘅言行同往績，政府同建制派都要同佢哋保持距離。

早前被搣全國政協委員嘅田少，尋日出席電台節目時回應落區一事時認真酸溜溜，口說官員落區係好事，但同時又話睇到陪同官員落區嘅人士，穿着印上所屬政黨或個人名字嘅衣服，認為似係推銷自己多啲。佢其後進一步質疑，有關人士係推銷政改，定係令自己嘅區選工作提早起步，又直截了當承認政府冇就落區嘅事直接搵該黨，而該黨亦未收過邀請或通知。話時話，政府連落區大龍鳳都冇借助自由黨嘅地區力量，或事先打招呼，雙方關係有幾好，都唔使多講喇。

自由黨五票被憂走票

另一方面，自由黨二十多人早前高調進入中聯辦，同中聯辦領導層會面討論政改，政治意味濃厚。有建制派中人分析，潛台詞係有關方面仍擔心自由黨五票會走票，要提早出招再次箍緊，之不過據聞田少當時剛好不在港，缺席呢次重要會面。究竟田少怕尷尬唔現身，定係有其他原因，呢個只有佢自己至知嘞！