中環出更：想再添丁 肥老闆有心有力
近期因為股市爆升而豬籠入水嘅立法會金融服務界議員張華峰（肥老闆），明日就係佢六十三歲牛一，尋日幾位黨友提早幫佢慶祝生日，祝佢繼續喺股壇有斬獲。不過，肥老闆就許下四大生日願望，除咗想減肥二十磅、恒指衝上三萬五千點及通過政改方案外，最爆就係想再添丁。一次過咁貪心許咁多願望，唔知邊樣可以成真呢？
63歲牛一 盼恒指三萬五
肥老闆首個願望係減肥二十磅，其實佢都唔係第一次話減磅，當年佢當選立法會議員時都話過減磅，但結果繼續大啖食，所以今次分分鐘都係冇咗件事。第二個願望就係添丁，雖然肥老闆現時已有一仔三女，但佢話想追多個，被問到係咪「有心有力」時，佢就突然挺起胸膛大喝一聲「哼！」，以證明自己雄風不減喎。
至於通過政改方案，睇怕實現呢個願望都有啲危喇。反而恒指衝上三萬五千點嘅願望，就應該有少少機會實現嘅。肥老闆分析話，如果政改方案被否決，應該有三日跌市，但之後一定會反彈，叫大家預備定彈藥入貨喎。到底邊個願望最終實現到，相信過多幾個月就知道。
卓妮