機警Miss及時叫喊學生避開
【本報訊】「好彩Miss醒目，如果唔係會死幾件！」有目擊意外的地盤工人，憶述事發經過仍捏一把汗。當時有班小學生在上址等車，詎料有冷氣機組件從天而降，千鈞一髮之際，帶隊的年輕女教師大喊學生：「全部人行前啲！」學生們聞訊即時閃避。機警Miss向警方稱，「見到有嘢跌落嚟整傷學生」；有涉事工人見到有學生受傷竟無動於衷，並擬執拾物品離開，Miss一度大叫：「無人嚟幫手？」幸毗鄰地盤有工人取來藥箱替學生包紮止血。
另外，理工大學機械工程學系工程師盧覺強指出，意外中的吊臂威吔懷疑斷裂肇禍，當中或涉保養問題。「依家有專門嘅儀器掃吓威吔有無內傷，肉眼可能睇唔到！」墮下的兩件共重約一千一百九十八公斤冷氣機組件，若以每件組件六百公斤計，由廿二樓直墮地面，重力可達十四點七噸；倘組件跌落三樓平台，重力約有十三點六噸，再反彈落地雖可卸去大部分重力，惟着地時仍有五點四噸力，他直言五噸重力足可「壓死人」。
私人地方吊運應要圍封
香港專業吊運聯會主席吳國榮表示，在私人地方進行吊運工序，工人會圍封現場以策安全；在公眾地方，即使工人未能圍封，相信亦會有人在地面指示及提醒途人不要行近。他又估計，倘吊臂威吔斷裂肇禍，不排除因金屬疲勞所致。