路署靠害 途人頻墮坑渠
市民誤墮渠蓋陷阱受傷，路政署被指製造陷阱！有市民早前途經港鐵天水圍站附近行人天橋時，因誤踏移位渠蓋而「跌落坑渠」受傷。事隔一個月後再途經現場，發現情況並無改善，不滿當局無視危機。區議員踢爆路政署早已知悉事件，卻於事發後僅以索帶綑綁渠蓋，令意外再度發生。路政署最終在接獲本報轉介後急急進行維修工程，被批罔顧市民安全。
梁女士於兩個多月前取道天耀路、擬使用行人天橋前往港鐵天水圍站，行經天橋出入口位置時突然踏空跌倒受傷，「嗰吓自己冇為意，行行下跌咗落坑渠，睇真啲原來個渠蓋移咗位！」梁女士即時報警求助，被送到屯門醫院治理，證實右腳撞傷及扭傷。不過，梁於事發後一個月再途徑上址，發現情況依舊，不滿當局無視道路陷阱，罔顧市民安全，「個坑渠邊有石屎崩咗，所以個蓋點冚都好易冧落去，啲人唔為意差錯腳又會出事，好心快啲搵人整番好佢啦！」
承托點石屎脫落 踏上易下陷
記者到場了解，發現涉事渠蓋呈四方形，但其中一角欠缺承托點，另一角則因渠邊石屎脫落而無法穩妥擺放，容易下陷。即使再將渠蓋安放坑渠表面，亦易因外力及承托力不足而下陷。
路政署發言人承認，早前已接獲上址有渠蓋損毀報告，即時派員視察，證實有U形排水道渠蓋被移位，已將移位的渠蓋放回原處。接獲本報轉介後再次派員視察，同樣發現有關U形排水道有渠蓋移位，已即時將渠蓋放回原處。
不過，記者其後再到場視察，卻發現坑渠原本崩缺的石屎已被填補，而附近的渠蓋亦有被重置迹象，令渠蓋獲得足夠承托而不再下陷。在記者再次追問下，路政署發言人始透過電話回覆，承認當局其後確於上址進行「改善措施」，惟仍強調渠蓋及坑渠本身沒有損毀。
唔踢唔郁 接本報轉介始維修
「以我所知，有街坊出咗事之後，部門係有搵人嚟整過，但就只係求其搵索帶綁住個渠蓋就算，結果冇幾耐又有人踩中受傷！」當區區議員陳思靜直指梁女士的情況並非單一事件，批評路政署得悉有人受傷後仍未有作妥善跟進，最終再發生市民誤踏移位渠蓋受傷事件，部門亦要接獲傳媒轉介投訴才「急急」進行徹底維修，做法極不可取，「呢個位好多人行，都唔係得一個街坊中招啦，只係幫個坑渠補石屎咁簡單，點解都要拖咁耐先做？」
記者：楊育輝、詹海萍