所謂錢能壯膽，荷包袋多幾張金牛，出去溝女都特別有自信。至於女仔點先有自信呢？生得靚女當然甚有幫助啦，而日本水着界四大天王之一嘅西田麻衣就話，胸部愈大就愈有自信，拍寫真時可以充分表現自己，仲可以暢所欲言添。
巨乳女優無論係水着迷定係AV迷都極受歡迎，要喺日本AV界選出一個「乳」出驚人，雙峰夠大又夠靚嘅女優，一定非J奶尤物Julia莫屬，至於水着界方面，同樣擁有一對J-Cup爆乳嘅西田麻衣亦無出其右。現年26歲嘅西田麻衣被譽為日本水着界四大天王之一，同中村靜香、篠崎愛、佐山彩香並駕齊驅，大家喺水着界都係風頭躉，曝光率相當高。講真，論樣貌麻衣比起另外三位天王一定唔算係最靚嗰個，面上亦冇佢哋嘅童顏稚氣，之但係卻有一種高傲自信女人味。至於身材，麻衣就擁有四人之中最重量級嘅37J巨胸，質感脹卜卜而且柔軟度高，每次睇佢着泳裝都有大量胸肉從泳衣旁邊擠出，日本人就稱之為「橫乳自慢」，即係話麻衣對自己嘅波邊極有信心，而呢種信心喺水着界並不多見，原因係上圍經後期加工嘅女優一旦波邊露得太多，假波即時出醜。
西田麻衣自從喺2006年參加Spacecraft選美比賽，從3,152位參加者當中奪得冠軍，自此憑住一對J-Cup爆乳橫行水着界。麻衣喺水着界如魚得水之外，仲經常登上電視台綜藝節目做嘉賓，近年仲染指電影界，電影作品包括《京都太秦物語》以及《東京家族》等。麻衣人氣愈來愈高，個胸就愈來愈大，初出道嘅時候只有F-Cup，後來就升到I-Cup，到近年仲更上一層樓去到J-Cup。有評論就話麻衣個胸愈大，自信就愈強，由以前木訥寡言，繼而變成開籠雀，早前仲喺綜藝節目大爆水着界內幕添。佢喺節目入面話水着界佔九成女優都有上圍整形，但係佢個胸就十足真貨，仲叫人唔信可以即場親手檢驗。麻衣仲話好多女優落泳池拍寫真時，都會因為貪方便而罔顧衞生喺泳池小便，佢就堅持衞生原則，有次試過忍尿忍到膀胱發炎喎。麻衣大爆內幕之後引起熱烈討論，仲受到多方面施加壓力，最後終於要喺博客道歉。
西田麻衣經常都會喺博客發布最新消息，而消息多數都係吃喝玩樂相關，想知道麻衣又去到邊度歎世界，可以Click上去留意。
網址：http://ameblo.jp/mai-nishida/
年齡：26歲
身高：5呎3吋
三圍：37J-24-33
撰文：賢