「只准官家放火，不許百姓點燈」大家就聽得多，咁「只准官船噴煙，不許民車污染」見識過未呀？嗱，港府口口聲聲減排環保，呢頭推出停車熄匙，嗰頭坐視消防船噴煙，有冇荒謬啲吖。
話說本報接獲市民投訴，指消防處旗下兩大王牌滅火輪之一嘅卓越號，駐守青衣滅火輪消防局候命期間，黑煙長噴，引擎長鳴，搞到空氣混濁之餘，噪音仲好擾民添。咁仲唔止，經過本報記者連日實地視察，發現根本唔見有消防員喺船上執勤。即係話，消防處停船唔熄匙，帶頭浪費資源，污染空氣，破壞環境，為禍市民。
卓越號變咗「墨魚號」，有晒官方數據證明。卓越號去年出勤次數較前年大減一成四，只有約一千次，偏偏耗油量不減反增，比前年仲多出一成一，達三十萬公升。如果同另一艘同級王牌滅火輪精英號比較，卓越號去年出勤次數只係多過精英號一成一，但耗油量竟然多出七成六，你話係咪反常吖？所謂卓越號，滅火救人係咪「卓越」冇人知，但「耗油量」方面嘅表現「卓越」就冇花冇假。
咪畀功夫茶批中，卓越號零舍「食油」，如果唔係機件故障，就係冇停船熄匙。本報記者到中區滅火輪碼頭視察，發現精英號停泊待命期間，船上引擎並無發出聲響，煙囪更加冇煙冒出。同樣係王牌滅火輪，同樣係停泊待命，精英號安安靜靜，卓越號黑煙長噴，如果話耗油量同熄匙無關，講都冇人信喇。
聽吓消防處點解釋吖。發言人話喎，兩艘滅火輪停泊碼頭後都會關掉引擎，但因為要維持船上基本設施運作，必須要有電力供應，卓越號噴出黑煙相信係船上使用發電機所致。至於卓越號耗油量驚人，發言人始終講唔出究竟，一味話卓越號負責嘅水域範圍較廣，先至比精英號食油喎。官字兩個口，點講都得喇。
係人都知，船舶排放比汽車污染更勁，港府實施停車熄匙，冇理由停船唔熄匙吖。本身係海員工會副主席嘅立法會議員黃國健係咁講嘅，滅火輪待命期間，應改用岸電，咁做唔止可以減少船隻機件耗損，仲可以減低船上發電機產生嘅污染物添。環保團體亦話，岸電嘅直接排放係零，喺外國相當普遍，可惜港府搞環保唔湯唔水，至今仲未引入。
冇計嘞，當局搞環保不嬲得個樣，講就天下無敵，做就有心無力，其中消防處更加醜聞多多，唔係不務正業，就係浪費公帑，家陣仲帶頭污染環境添，唔怪得藍天白雲愈叫愈走喇！