講開港產官僚愛事前亂噏，又怎能不提當今教育局局長吳得掂。早前立法會教育事務委員會討論普教中成效，不少議員質疑普教中令學生「兩頭唔到岸」，既學唔好中文，普通話能力又未如理想，普教中更有矮化廣東話之嫌。議員所憂者大有道理，吳得掂卻強調推行普教中不存在扼殺廣東話。咁唔叫扼殺即係謀殺？吳得掂接着又表示：截至一三年，全港小學推行普教中的百分比由五成多增至超過七成，中學則由三成增至三成七，但學界對全面推行未有共識，普教中現僅屬「遠程目標」。
呢，吳得掂嗰頭話「不存在扼殺廣東話」，這頭話普教中屬「遠程目標」，咁仲不存在扼殺廣東話？明明自我矛盾還要死撐！老朽向來反對普教中可以提高中文水平之說，更加不認同所謂「遠程目標」是實行中小學全面普教中。事實上，粵語教中文沒有甚麼不妥，好心啲一味廢噏嘅港產官僚及對語文教育外行嘅議員睇吓李婉薇著嘅《清末民初的粵語書寫》，當知粵語有其優雅及強勢。
香港官僚不重視粵語，反而外國學者有不少痛下工夫研究粵語。好似美國語言學家包睿舜從七十年代起從事粵語語音學嘅研究，包氏以香港漫畫探討粵語寫作的論文頗受學術界重視，他在二○○二年與張群顯合著《以漢字寫粵語》；又如美國學者唐斯諾在一九九一年完成關於香港粵語作品嘅博士論文。
此外，十九世紀末，很多傳教士相信粵語不是方言，而是一種歷史悠久嘅語言，編寫了不少粵語和廣東方言著作嘅James Dyer Ball就是箇中代表。
唔通「禮失而求諸野」，粵語在港產官僚嘅打壓下就此氣數盡？吳得掂，咪眼眨眨，扮花旦，廢官廢話扮老薑，盞笑甩人哋棚牙！