政情：親自為議辦落閘 「怡」似執笠
區議員助理人工一向唔高，連帶流失率亦甚高。中西區區議員蕭嘉怡（Kathy）自爆，其前助理亦喺農曆新年前後辭職，期間大小事務由佢一腳踢，出去做嘢仲要自己落埋閘，試過因而被街坊誤會，以為佢嘅議員辦事處執咗笠。
Kathy話，佢其後試過喺勞工處同地區報落廣告請人，點知加埋只係收到唔夠十份履歷，好在有學生義工喺呢段時間幫手，最近亦成功喺黨內搵到合適人選做助理，笑言希望對方唔好咁快就走喎。
講湊女甜在心
Kathy早前請議助一波三折，不過講起依家一歲半嘅囡囡就甜在心頭，透露街坊見親佢做地區工作時，都會慣性問吓佢囡囡近況，加上囡囡非常外向，跟街坊去隔籬舖玩幾個鐘都冇問題。