政情：八網難逃：陳雲生夫婦 自駕遊日撞車
港人趁日圓低水排住隊去日本旅遊，連屯門區議員陳雲生都唔例外，早幾日佢聯同家人去沖繩自駕遊，不過旅程之初已發生一段小插曲。陳雲生話前日黃昏時間，太太龍瑞卿負責開車往沖繩北部，途中遇上滂沱大雨，到達酒店時儀表板亮起紅燈，顯示行車電力不足，諗住將車泊到停車場再作打算時，點知失控撞凹咗前面車輛車尾。
前車司機係港人
陳雲生話，由於佢唔識日語，正愁緊點樣與前車司機交代時，經酒店協助後得知對方都係港人，即時免除咗溝通障礙，又慶幸大家都冇大礙，估計今次意外會要多花費約一萬日元。
另外，陳雲生同家人尋日又撞正當地發生地震，佢最初話唔為意，直至其兒子致電問候時，佢先得知當地有地震喎。