政情：財爺估錯市 冇回應 避狙擊
恒指上周連日升市，加上電視台重播經典劇集《大時代》嘅「丁蟹效應」，財政司司長曾俊華（鬍鬚曾）前日發表網誌就估計尋日股市好可能會裂口低開，但最終鬍鬚曾估錯市，恒指起初高開百多點。唔知係咪因為老貓燒鬚，鬍鬚曾尋日早上出席活動後冇再回應股市問題，亦揀咗非正門嘅另一出口離開現場。不過，其實佢都錯唔晒，恒指高開後掉頭倒跌，收市時跌五百多點。
唔揀正門出入會展
鬍鬚曾昨早出席貿發局舉辦嘅家庭用品及家用紡織品展開幕禮。議員梁國雄等人一早喺會展港灣道會場外，帶同紙製大白象等示威物品抗議，批評機場第三跑道等工程為「大白象」，促請港府盡快設立全民退保，但被在場保安阻止入場。而鬍鬚曾亦選擇非正門嘅另一出口，即係博覽道嗰邊，輕易避過梁國雄等人嘅狙擊。