政情：黃成智疑遭白鴿清算

謀落戶粉嶺南 遴選冇影

黃成智早於九十年代初就當選北區區議員，其後斷斷續續有贏有輸，連同當選立法會議員亦試過做「雙料議員」。但係佢於一一年區選同一二年立法會選舉都落敗，就變成「雙失」議員。

據悉，黃成智考慮喺年底區議會選舉捲土重來，再次申請代表白鴿黨出選北區區議會，有意落戶新劃選區粉嶺南，惟聽聞白鴿黨新東支部上周五召開會議先後否決推薦三人代表該黨出選，黃成智係其中一人。而事有巧合，黃成智當日缺席有關會議，未有於現場介紹政綱同解答在場人士提問。

對於有傳黃成智未獲推薦代表白鴿黨出選，或同早前政改「袋住先」言論有關。白鴿黨新東支部主席周錦紹接受查詢時承認，有與會者對黃成智有關言論作出提問，但基於黃因事未有出席，亦未有授權他人代為解釋，或提交書面政綱拉票等，所以席間冇人可以替佢解答問題。

事件主角黃成智亦坦承，自己有向黨申請參選年底嘅區選，稍後亦會向黨補交資料。當問及當日點解冇去開會，黃聲言「仲乜要同你交代原因」，強調會向黨新東支部解釋喎。

需10黨友支持 或可翻身

據聞黃成智口中嘅「補交資料」，距今有一段時間，講緊係今年六、七月嘅中委會，屆時要由起碼十名黨友聯署支持佢參選，再經中委審批至得，加上通常由黨支部推薦嘅人，中委會好少會否決，所以黃成智今次未獲推薦，加上「袋住先」言論被黨內激進派狙擊，如果要翻身力挽狂瀾嘅話，黃成智認真要諗吓計喇！