中環出更：政改倘通過 港交所升至$400股？
二○一七年特首普選方案明日出爐，建制派接連出招爭取泛民回心轉意支持，其中立法會金融服務界張華峰（肥老闆）都想政改通過，疑以另一方式希望爭取泛民支持，理據係如果政改通過，政府就可集中精力發展經濟，加上「深港通」預料提早開通，屆時股市一定繼續節節上升，其中港交所嘅目標股價上升至四百元並非難事。
愈跌愈買 實行「溝貨」
肥老闆近期喺股票市場大有斬獲，佢尋日中午同老友共進午餐，雖然撞正恒指高開百多點後掉頭倒跌，肥老闆繼續唱好港交所，一發現港交所股價急瀉近十蚊，即刻拎起電話打畀御用經紀落盤，以差唔多二百七十蚊掃咗五萬股港交所。
事隔不足十分鐘，港交所價位再跌多兩蚊，在場人士都戥佢肉赤，點知肥老闆愈跌愈買，打多個電話畀經紀再掃多五萬股「溝貨」。據聞有人幫肥老闆埋單計數，單係短短半小時已用咗二千七百萬元入貨，加上股市全線下跌嘅情況下，肥老闆帳面上仍賺咗三十萬元，認真係見慣風浪嘞！
卓妮