中環出更：名牌減價唔預男裝李三元留手

東華歷屆主席會早前搞聯歡晚宴，多位前主席包括陳聖澤、陳耀莊、李三元及陳文綺慧（Viola）等齊現身。做鐘錶生意嘅孫秉樞一向鍾情紳士打扮，每次出街衫褲鞋襪必定襯晒色。對於歐洲名牌最近紛紛減價，孫秉樞慨嘆名牌減風只有女士受惠，男裝連少少折扣都無。

正就讀博士學位嘅李三元不時去歐洲掃名牌衫，佢日前飛到上海出席一個意大利名牌晚宴，搶先掃春裝，雖則歐元平，計落抵過喺香港買，可惜減風未去到男裝，否則佢出手會更狠喎。

孫秉樞（右）同李三元談及歐洲名牌減風，同樣話男裝暫時未受惠。

陳文綺慧話名牌袋減價都吸引唔到自己。（葉華英攝）

陳文綺慧鍾情軟腍腍手袋

不過，同場出席晚宴嘅Viola話唔會去執平貨，自言好少追逐名牌，買手袋最緊要袋身夠「軟腍腍」，又話係咪名牌貨反而唔重要。

另一方面，本身賣珠寶嘅陳聖澤透露鑽石售價都輕微下調，事關內地搶購奢侈品風氣收斂，喺供多求少下，鑽石價格回落幾個百分比。佢又提及，雖然內地買家收歛，轉頭輪到香港闊太出手，趁平掃鑽石保吓值。

卓妮