如果要舉辦「最不人道居所博覽會」，香港係必選之地。當年令英國攝影師「震驚」嘅天台籠屋，不過係小兒科咋，淨係劏房已經五花八門，好似貨櫃劏房、雞欄劏房、豬欄劏房、教堂劏房等，近排仲有「廁所劏房」添，正所謂，沒有最騎呢，只有更騎呢。
顧名思義，「廁所劏房」即係以廁所為家。不妨睇睇觀塘一幢樓宇內嘅「示範單位」，面積得三十方呎，上床下廁，上面瞓人，下面洗臉沖涼開大開細乜都搞掂。由於面積實在太細，張「閣仔」吊床要「偷位」僭建出走廊，仲要打斜瞓至勉強伸得直雙腳。咁都唔止吖，由於張床實在太矮，沖涼只能坐喺廁板上面，問你點頂。
唔好睇小廁所劏房吖，租金一啲都唔平，叫價每月二千二百元，呎租七十元，比起觀塘市中心嘅大型私人屋苑竟然高出七成半。冇法子喇，房屋問題持續惡化，無殼蝸牛望樓興嘆，唔理好醜，但求就手，幾騎呢都有人租，仲要爭崩頭，手快有手慢冇。正如區議員話齋，近年區內基層市民對劏房需求殷切，套房幾乎一招租就被搶租一空。樓價飆升帶動劏房租金急升，租客只能「將貨就價」，不斷降低居住質量，愈住愈細，真係睇見都淒涼。
話時話吖，咁惡劣嘅居住環境，莫講話發達社會難以想像，連第三世界國家都未必見得到，監倉都不如，根本唔適宜人類居住。香港自詡「國際都會」，一邊係摩天大樓富麗堂皇，一邊係窮人居所不如狗竇，相映成趣，簡直係香港之恥！
嗱，同樣係商業城市，同樣係地少人多，新加坡人均居住面積達三百方呎，香港只得人哋一半，你話係咪羞家吖。新加坡年輕人一結婚就有屋住，梗係社會和諧，安居樂業喇，香港年輕人上樓無望，前路茫茫，咪走上街頭抗爭囉。中央官員話房屋係經濟同民生問題，搞得唔好就變成社會問題同政治問題，一啲都冇講錯。
有人批評劏房業主無良，挖空心思賺錢。其實有需求就有市場，廁所劏房都有人爭，皆因房屋供應不足，唔住劏房，唔通瞓街咩。前朝貪曾政府無所作為，埋下禍根，現屆政府話就話將房屋問題作為施政重點，無奈阻力重重，寸步難行，呢度唔准動土，嗰度唔可以起樓，十年房屋大計隨時變成畫餅充飢嘅咋。再咁落去，有人可能連廁所劏房都冇得住添吖。