香港啲官僚除咗鍾意隨口噏當秘笈外，好似財爺鬍鬚曾咁，話搞美食車喎，之不過又係煲冇米粥，講咗當做咗，根本冇因應香港實際環境，是以到頭來吹完水，就贏得葫蘆裏裝糯米飯——好進難出；然而，好歹提過也是「創意」，沒有推行時間表，大家將就將就，好快又一年過去了，屆時再來隨口噏，又有秘笈喇！
當然，等而下之的香港官僚，就係周身郁，動作多多，睇真啲，無非洗腳唔抹腳，好似周一鑊呢位前食衞局局長，家陣被翻閹嘅平機會主席，一味周身郁叫人忘不了他，一時高調出席同志團體活動，一時又建議喺平機會架構下加設月薪逾十六萬元嘅營運總裁一職來「分擔工作」，讓其可專注對外交流，建立平機會嘅機構形象喎！
想減輕工作又唔肯減薪，周一鑊諗縮數真係精過無尾蛇！試問一個廢鑊又煮得出啲乜嘢好餸呢？據聞上月佢又致函二十三間公營機構，邀請佢哋北上參加中聯辦協辦、清華大學主辦嘅研討會，主要探討中國現代化進程，以及探討點樣有效監察政府運作。
講真，研討會主題與民生無關，更與平機會工作大纜都扯唔埋，反而「有效監察政府運作」有啲啲意思，說來諷刺，平機會之所以成日淪為話柄，一時大花筒、一時自把自為無王管、一時洗腳唔抹腳……睇怕索性把個題目改做「如何有效監察平機會應使則使」，為周一鑊貼身而設更實際！
今次周一鑊帶團北上，聽講仲要包埋內地講者使費，廢鑊視公帑如無物，又愛面子扮好客之道嘅大哥，理應自己拿一個月人工出來招呼吓北大人及清華學者，咁才是大哥好客之道！否則，周一鑊未任滿平機會主席一職，已見兩腳泥，老朽都唔知佢點去清洗！