泛民同建制喺議會內唇槍舌劍就見得多，大家同聲同氣就難得一見。尋日立法會召開小組會討論今年區議會選舉開支等事項，講到資助額同選舉開支限額，泛民及建制派口徑一致勁呻唔夠錢用，有議員仲提議將郵遞宣傳品嘅資助折現，真係計到好盡。
民主黨劉慧卿指，區議會選舉候選人嘅資助額由每票十二元增至每票十四元太少，好難鼓勵人參選；民建聯鍾樹根亦附和指，好多文宣品會隨着選舉臨近而坐地起價；獨立議員謝偉俊就建議資助埋電郵宣傳品，或將郵遞宣傳品嘅資助折現，以免候選人為咗獲得資助而選擇郵遞，同時減少浪費。
難得大家同聲同氣，但署理政制及內地事務局局長劉江華就唔多理，重申今次係根據物價指數作調整，又話選舉開支限額已由五萬三千八百元增加至六萬三千一百元，加幅合理。