政情：圖片展 智「思」百年滄桑
跑馬地未有馬場時係點樣？現時高樓大廈林立嘅禮頓山，又係咪真係一座山？由一班外國人組成嘅歷史遺珍攝影基金會，最近喺上環搞咗個百年歷史圖片展，展現一百年前香港仲係小漁村時嘅風貌。最特別嘅係，基金會專登搵人重返當年影相嘅相若位置影低現時面貌，今昔對比一齊展出，見證百年滄桑。行政會議成員陳智思（Bernard）及其姪女陳曉鈴都睇到津津有味。
「最愛跑馬地舊照」
一向熱衷藝術及保育嘅Bernard話，最鍾意兩張相，一張係跑馬地黃泥涌道舊照，因為佢自細就住喺跑馬地，一直都好想知跑馬地未有馬場時究竟係咩樣，今次睇到舊相先知，原來一百年前係一片綠油油嘅農田。至於第二張相就係未起樓嘅禮頓山，確係一座冇花冇假嘅小山。見Bernard睇得咁入神，難怪佢慷慨贊助今次展出。