政情：立會股神高位沽貨
香港股市喺復活節長假後突然「復活」，接連兩日升逾千點，唔少股民爭相入市，亦有人趁高位沽貨離場。立法會金融服務界議員張華峰（肥老闆）及保險界議員陳健波一向係立會股神，唔知佢哋係咪賺到笑？一向睇好港交所（00388）嘅肥老闆直認尋日高位沽貨，估計賺咗三百萬。至於陳健波就謙稱喺港股「放煙花」前已經走晒啲貨，只係賺咗少少茶錢喎！
張持388 帳面過億
呢波牛市表現勁標青嘅港交所，向來係肥老闆至愛，記得佢去年尾曾掃入唔少港交所，今鋪應該賺到笑。我哋打電話問佢戰績如何，正帶隊北上深圳訪問嘅肥老闆話，一早睇好滬港通，而滬港通最大受惠係港交所，所以去年中開始大舉掃入港交所，平均價大約係一百四十幾元。肥老闆話，預計港交所仲有得上，所以尋日朝早喺二百四十幾元時，「係咁意」放咗近三萬股。我哋幫佢計過條數，至少賺咗三百萬，認真和味，果然係立會股神。
市場傳聞，肥老闆喺高峰期揸幾百萬股港交所，雖然近年不斷減持，但聽聞仍然手持最少五十萬股港交所，按照市價計，帳面過億元。我哋同肥老闆求證，佢就一味笑騎騎唔肯答喇！肥老闆斬獲咁大，唔知會唔會同議員辦事處職員分甘同味，出「特別花紅」呢？
「放煙花」前陳散晒貨
至於陳健波就話，佢喺港股「放煙花」前已經走晒所有貨，最後一批內房股都喺日前沽清，慨言未能食正最近牛市嘅甜頭，只夠贏少少飲餐茶喎！陳健波仲話，自己炒股幾十年，見過晒風浪，依家個市乜股都升，實在唔敢高追。佢預計大市好快有調整，寧願等個市回落，待下一波升浪先再重錘入貨喎！