中環出更：楊孫西寫回憶錄分享人生
雲南旅港同鄉會（同鄉會）早前舉行新一屆董事會就職晚宴，城中知名雲南省籍鄉親及友好人士齊集，包括會長兼香港宣威集團董事長浦江、名譽會長莊哲猛與千金莊菲娜及莊莎娜、太子珠寶鐘錶副主席兼執董鄧宣宏雁（Emily）等人，莊哲猛嘅親家香江國際集團董事長楊孫西亦現身撐場。楊孫西透露，正着手整理一箱箱嘅相片，打算日後出回憶錄，為精彩嘅一生留下回憶。
楊孫西卸任全國政協常委之後深居簡出，佢話依家得閒就寫吓字、沏吓茶，享受隨心所欲嘅生活。佢又自爆開始整理舊相及資料，包括自上世紀六十年代創業以來嘅點滴，若有機會可能會出回憶錄喎！
鄧宣宏雁盼零售業「破冰」
莊哲猛就話，雲南係中國最多少數民族嘅省份，惟地區基建落後，所以當晚亦宣布成立雲南省民族團結進步基金，並捐出一張大支票，凝聚港澳人士力量為少數民族獻愛心。
出任同鄉會名譽會長嘅Emily就開心報喜話，大仔鄧亦軒已由董事升任執董，冀能幫輕爸爸鄧鉅明嘅工作。
近排國際名牌因應歐元貶值而減價，吸引市民大排長龍搶購，唔知降價潮會否蔓延至名牌腕錶？Emily就話未收到消息，佢形容鐘錶界正處於「冰河時期」，希望零售業界有「破冰」好消息喇！善德基金主席董吳玲玲亦有到場，佢話基金最近推出關愛科技青年發展計劃，七月將會資助一百名中學生到北京及西安考察。
卓妮