出一條數學題考考大家：小明免息分期買咗一千元貨物，分五期付款同分十期付款，總數有冇分別呢？呢啲小學雞數學又點會考起大家吖，答案當然係冇分別啦。
道理一字咁淺，偏偏港產官僚詐傻扮懵。係咁嘅，機管局計劃花費巨資興建機場第三條跑道，引發唔少爭議，當中最令人質疑嘅係向旅客徵收一百八十元機場建設費。機管局係咁講嘅，建設費以用者自付為原則，計劃明年開始徵收。喂，三跑十畫都未有一撇，咁快就向旅客開刀，點都講唔通啦，何況家陣旅客已經要支付離境稅及燃油附加費，百上加斤，負擔真係唔輕o架。
可能機管局都知爭議多多阻力太大啩，近日開始轉口風，聲稱萬事有商量，正研究調低收費喎。調低幾多呢？據聞方案之一係將徵費年期攤長一倍有多，由原先約七年增至十五年，建設費有望大幅下調。另一個方案則可能採取彈性收費，長途旅客收貴啲，短途旅客收平啲喎。
講來講去，咪又係數字遊戲。所謂攤長年期收費，表面係收少咗，但收費年期大增，拉上補下，條數根本冇變過，更可能不減反加添。至於長短途不同收費，更加係冇嗰樣整嗰樣，分明巧立名目啫，呢啲小學雞伎倆，點呃得到市民吖。
最好笑嘅係，機管局吹水唔抹嘴，嗰頭揚言三跑超支將由局方一力承擔，呢頭就縮沙，聲稱問政府攞錢「可能性不大」喎，擺明係心虛啦。其實，根據近年大型基建例牌嚴重超支嘅「往績」嚟睇，三跑唔超支至奇喇，連機管局自己都承認，三跑延遲興建一年，成本就會增加七十億元，錢從何來？到時咪又係要政府包底、納稅人埋單。
再講吖，機管局除咗透過借貸承擔當中三分之一工程費，以及向旅客及航空公司徵費，另外一個集資途徑就係停止向政府派息十年，淨係呢條數，大大話話有五百多億元。羊毛出自羊身上，咁做同動用公帑根本冇分別。難為當局仲話三跑可帶來四千五百億元經濟效益，創造逾十萬個職位喎，講就好聽咯，其實一味靠估，反而一千四百幾億元建造費就冇花冇假，只會增加唔會減少。
咁講啦，香港要保持國際航空樞紐地位，冇人反對興建新跑道，之但係，人情還人情，數目要分明。三跑係史上最貴單一基建項目，加上空域爭議未解決，市民擔心得物無所用，淪為大白象工程，絕對唔係杞人憂天。港府聲稱考慮成立諮詢委員會，接受公眾監督，釋除疑慮。嗱，講到就要做到，唔好又係大隻講吖。時間唔等人，再拖落去，三跑未起好，香港可能已失去航空樞紐地位嘞。