政情：林健鋒「無辦法」
香港踏入新一個選舉周期，首場大戰就係今年底嘅區議會選舉，日前有傳建制大黨不滿商界議員林健鋒（Jeffrey）所屬嘅工商政團經民聯，破壞建制派協調機制，四處派人空降參選。我哋尋日於中環撞到Jeffrey即刻問過究竟，Jeffrey自言從市民角度出發，多啲人做社區工作何樂而不為，唔明點解某啲人要呷醋喎。
稱地區工作非「零和遊戲」
該黨副主席Jeffrey話，佢哋於兩年前已派人到新界東做地區工作，如果有人唔滿意佢都無辦法，事關地區工作從來唔係「零和遊戲」，唔係話某政黨做嘢，其他人就唔畀做。佢仲話，如果有人擔心其他人比自己做得好，咁就要自我檢討吓，唔係喺度妒忌其他人。
Jeffrey又指，相對於大型政黨，佢哋的確無乜地區樁腳，但佢哋唔少社區主任都係律師或專業人士，唔係一味搞旅行或送嘢畀長者，相信畀多個選擇街坊，絕對有利無害。講到底，區選都係講勝算，建制陣營於撞區區份嘅最新形勢，料未來數個月將會明朗化。