政情：潘兆平錯有錯着

港九勞工社團聯會（勞聯）上周六改選領導層，吳慧儀繼續冧莊做主席，勞工界議員潘兆平（潘少，圖）退任副主席，改任勞聯四名常務委員之一。可能喺立法會工作忙到暈陀陀，潘少竟然擺烏龍，一來以為下個月先至改選領導層，尋日仲打算「拉票」叫人唔好選佢做勞聯主席或副主席，認真失威。

政黨政團嘅領導層改選，候選人努力拉票係人之常情，但潘少疑反其道而行，對出任主席或副主席均心如止水，理由係想專注立法會工作。雖則潘少連勞聯改選日子都記錯，而改選結果卻一如佢所願，由副主席「降呢」至常務委員。

而轉眼間，潘少已出任勞工界議員兩年半，知名度未見顯著提高。不過，佢笑言，呢段時間有三大得益，第一係肚腩肥咗一吋、第二係重咗五磅，第三就係血壓高咗，估計可能同坐得多同少做運動有關。