政情：搵新政助 德成撻Q？
民政事務局政治助理徐英偉（Caspar）上月底被傳媒披露已向政府遞信請辭，打算趁所屬政黨下月領導層換屆，回巢出任總幹事做「大內總管」，其繼任人選嘅消息隨即滿天飛。據聞Caspar嘅直屬上司、民政事務局局長曾德成一度揀中有懲教署背景、比Caspar年輕嘅公務員任民政局新政助，但有傳於品格審查階段衰咗。隨着Caspar離任嘅時間逼近，「無縫交接」或者係一廂情願嘅想法。
建制派紛薦人選
港府於○八年開設副局長及政治助理兩層政治委任制度，Caspar當時出任民政局政助至今，係歷來在任最長嘅政助，及至上月才被傳媒披露有意離開政府。據聞政府內部知悉此事後，如意算盤係下月中公布Caspar離任消息時，一併公布其繼任人，而Caspar亦會重返「娘家」民建聯任總幹事，確保雙方都做到「無縫交接」。
要做到雙重「無縫交接」，最緊要係敲定新任民政局政助人選。有政界消息透露，民建聯曾向曾德成推薦兩個黨友出任民政局新政助。不過，曾德成冇照單全收，主因係民政局政助一職若再由政黨成員接任，會影響外界嘅觀感。
疑品格審查衰咗
另一方面，曾德成亦唔係一味只等人推薦，決定親自掛帥揀蟀。據知其中一人來自懲教署、比Caspar年輕嘅公務員相當符合佢要求，有傳已到達品格審查最後階段，但埋門一腳「甩轆」無緣轉任。難怪曾德成日前同傳媒茶敍時，亦都開口歡迎大家向佢推薦合適人選。
據知政府內部最新評估，唔會再強求所謂「無縫交接」，只要Caspar獲相關諮詢委員會批准離任，民政局政助職位就會暫時懸空，直至有合適人選出任為止。
除咗Caspar，民政局副局長許曉暉（Florence）於同一職位亦出任長達七年，而現屆政府一二年重組架構時，許一度係新設嘅文化局局長大熱人選，惟最終因文化局開局失敗而原職留任。話時話，依家連同Florence合作多時嘅Caspar都有新動向，唔知一旦有人向佢招手，佢會否心郁郁想棄官出外闖一闖呢？