中環出更：拖篋始作俑者 范國威爭住認
特首梁振英（CY）日前與各界人士茶敍時，點名批評「香港本土」發起人、公民黨議員毛孟靜（正盲毛）係「始作俑者」，帶頭喺尖沙咀「拖篋」，反對內地遊客，有與會者更引述話CY批評正盲毛帶頭反水貨客。正盲毛當日承認「拖篋」係行為藝術，死撐並非唔歡迎內地旅客來港。正盲毛同「香港本土」另一發起人范國威（Gary）尋日舉行記者會辯解，其中未被點名批評嘅Gary仲爭住認係拖篋抗議嘅始作俑者。
正盲毛死撐歡迎旅客
正盲毛於記者會上自詡為「反水貨王后」。佢更聲稱收到「特首辦更正版本」，指CY當日都有批評Gary，又叫CY有指控就公開講，重申佢哋歡迎旅客來港，只係要求限制「一簽多行」同對個人遊設限。
Gary則自爆，自己兩年多前已經「拖篋」抗議，正盲毛即時和應話Gary先係「真正始作俑者」，兩人其後仲即場重演當日喺尖沙咀天星碼頭外嘅「拖篋」行動。依家正盲毛同Gary爭住認做「拖篋」始作俑者，似乎為咗可以增加曝光率，真係無所不用其極。
卓妮