中環出更：IS疑滲外傭圈 名人熱議
有外籍傭工近日於香港多個同鄉聚腳點派發單張，邀請同鄉出席喺本港舉行嘅一個神秘聚會，據報單張上懷疑印有伊斯蘭國（IS）嘅標誌，引起各界討論關注，事關本港唔少家庭都有聘請外傭。卓妮早前喺香港廣州社團總會成立典禮上見到總會永遠名譽會長梁高美懿（Margaret），佢話家中外傭雖然唔算由細睇住佢啲仔女長大，但前後相識廿多年，彼此非常熟悉，佢亦會多啲關心對方。
劉文文：唔驚得咁多
同場嘅廣州海外聯誼會成員之一嘅劉文文（Lisa），亦對據報嘅單張相當關注，又指佢家中聘請嘅印傭平日唔多鍾意出街，放假通常都係留喺屋企，認為未必收過有關單張。但現今網上資訊發達，唔使外出都可以收到不同訊息，Lisa就認為唔驚得咁多，而家中外傭受僱工作咗約三年，暫時都唔覺外傭有乜異樣。
菁英會副主席林凱章家中亦有聘請菲傭，佢認為本港係一個國際大都會，相信無論入境處、海關等部門嘅情報及把關工作，都會做得好好。
講番廣州社團總會嘅成立典禮，當晚筵開百多席，總會中有多名霍家中人嘅身影，其中創會會長係港區人大代表霍震寰，佢兄長、立法會前議員霍震霆亦擔任永遠名譽會長，而霍震霆兩名兒子霍啟剛及霍啟山則分別出任副會長及副主席。
卓妮