有人話，生活喺世界上，就有義務令佢更美好，咁至係生活嘅真正意義。講係咁講嘞，可惜喺現實當中，要令生活更美好一啲都唔易，尤其係今時今日嘅香港，衣食住行樣樣難，生活又點可能美好呢。
嗱，一項針對全球城巿生活質素嘅調查顯示，香港僅排於第七十位，同第二十六位、亞洲排名最高嘅新加坡簡直係蚊髀同牛髀。呢項排名係根據各城市嘅政治社會環境、經濟環境、醫療衞生情況、消費服務、公共服務及交通運輸等因素而得出，負責調查嘅國際機構係咁講嘅，香港相對於大部分鄰近城巿水平算唔錯，但空氣污染及道路擠塞情況令人關注喎。
其實，香港生活愈來愈艱難，又點止空氣污染及道路擠塞令人關注吖。日前英國經濟學人智庫公布全球生活成本最高嘅十大城巿，香港排於第九位，較去年急升四位，亦係十二年來首次打入十大。究竟乜嘢原因？答案好簡單，除咗因為港元跟隨美元轉強，租金高企拉動零售物價向上亦係主要原因。以一支七百五十毫升嘅葡萄酒為例，十年前香港僅售約一百一十五港元，五年前可能受惠於取消葡萄酒稅項等因素而減至約一百零九港元，依家又升至約一百二十三港元，完全消化咗免稅嘅因素。
見微知著，葡萄酒售價嘅變化，只係香港生活成本不斷上漲嘅縮影咋。有位內地富豪曾經慨嘆，香港人勤奮工作，但住房咁小，生活質素咁低，唔值得。咁又係吖，香港地價高、樓價高、租金高，生活成本自然高喇，而生活成本高，生活質素又點可能改善吖。所以話，一榮俱榮，一損俱損，香港地產獨大，唔止營商愈來愈困難，生活亦愈來愈艱難。
其餘唔講，淨係睇居住面積就知道，香港平均每人只有約一百五十呎，而新加坡平均每人有三百呎，足足係香港嘅一倍，而且唔少香港人仲係住劏房甚至貨櫃、豬欄添。不能安居，豈能樂業，香港居住問題不斷惡化，生活質素唔跌至奇喇。
講開又講，香港唔止居住環境惡劣，社會環境一樣烏煙瘴氣。喺泛政治化之下，日日嘈喧巴閉，一時佔領，一時光復，令人煩不勝煩，忍無可忍。有人話，香港人去新加坡睇吓，自己都覺得醜。真係冇講錯o架，以前香港同新加坡都係亞洲四小龍，不相伯仲，點知人哋不斷進步，我哋就不斷退步，搞到距離愈拉愈遠，講起真係醜怪。
所以話，風水輪流轉，一個地方嘅興衰早就注定，香港氣數已盡，樣樣都唔掂，又點止生活質素每況愈下吖！