政情：入鄉隨俗 馬斐森晒書法
各間大學輪住舉行春茗，尋日輪到香港大學。來自英國嘅校長馬斐森入鄉隨俗，除咗用廣東話帶領一班港大管理層祝大家「新年快樂」之外，原來佢仲秘密練兵，前日用一個鐘上咗堂書法速成班，尋日喺春茗即席揮毫，寫咗個「羊」字，祝賀大家羊年「洋洋得意」，佢仲喺墨寶上印上雕咗馬斐森三個中文字嘅印章，好有意思。
馬斐森第一次喺香港過農曆新年，難得又有幾日假期，就同太太周圍去玩，除咗去石澳行山，仲去咗大埔林村許願樹。唔好睇馬斐森平日斯斯文文，原來佢身手都唔錯，拋寶牒許願一擊即中，但佢唔肯透露許咗個咩願望，怕「講咗唔靈」喎，只係話同家庭有關。
老婆愛犬撐場
平時好少面對傳媒嘅馬斐森太太，尋日都有現身支持丈夫，仲拖埋六歲大狗女Darcy同大家打招呼。雖然Darcy身形比較大隻，但就好聽話，氹得在場各位好開心。