政情：AV仁辭職得個講字
民主黨（白鴿黨）「超級區議員」何俊仁（AV仁）今年初搶先宣布將會透過辭職引發「變相公投」，但呢個建議引來唔少爭議，其中黨內外都有人唔同意AV仁呢個決定；加上該黨近期開始淡化此事，講講吓隨時會令辭職公投一事胎死腹中。唔通AV仁呃盡曝光後原來係煲無米粥？
當日AV仁公布辭職一事，其實只係經過黨內中常委討論，但就隱瞞晒所有泛民主派，連黨員都隨時係睇電視先知發生乜事，難怪無論黨內外對此都有好大意見。依家辭職公投就交由佔領行動衍生出來嘅「五方平台」處理，各派代表成立八人工作小組，聲稱先行清理咗啲「沙石」，然後處理公投細節喎。
「一退係死路」
據知白鴿黨內對此莫衷一是，支持同反對AV仁辭職各佔一半，只係一開始眼見佢打晒開口牌，去意已決，所以先唔多出聲反對。對於黨內溫和派而言，辭職公投基本上就係鎖死立場，冇空間華麗轉身支持「袋住先」。至於激進派亦有意見，認為既然該黨否決方案，事後辭職係無謂，但事前辭職在時間上又趕唔切，就算趕得切，輸咗咪又係要投支持票？
有白鴿黨員預料，呢啲爭議應該會喺黨內發酵，到下月黨大會，隨時有人動員反對，嘗試推翻辭職決定，到時真係否決，就會有下台階畀溫和派轉身。不過，有黨員就認為AV仁唔講都講咗，「一退係死路」，又指五年前係咪對政改中途方案「袋住先」都有巨大分歧，所以今次有分歧都唔出奇。
選票私怨作祟
至於黨外形勢，有黨中人都見到部分泛民因為選票考量、私怨等放軟手腳，導致準備說帖、辭職日期等仲未決定到，可見泛民內部都唔係齊心一致；加上市民似乎又唔多明白、甚至反對辭職公投，批評浪費納稅人大量公帑，所以辭職公投一事會否胎死腹中，相信唔會等好耐就知道。