政情：中環出更：政改＋創科 莫乃光兩面受壓
政改形勢岌岌可危，資訊科技界議員莫乃光（Charles）一向被視為政府重點撬票對象，業界一眾年輕選民近日發起聯署，要求Charles唔好「袋住先」。此外，創新及科技局之前喺立法會財務委員會一役敗北而回，業界已歸咎Charles無盡力阻止泛民「拉布」，加上泛民再度表明一定會喺創科局第三度闖關時「拉布」，搞到佢兩面受壓。
IT界搞聯署箍票
資訊科技界一班後生選民最近亦有樣學樣成立前線科技人員議政小組，更喺社交網站發起聯署，呼籲業界選民簽名堅持唔要「袋住先」。有業界更坦言聯署係想「箍實」立場唔多清晰嘅Charles，叫佢唔好漠視業界民意轉軚。Charles就重申會跟大隊否決「八三一」框架下任何方案，堅持唔肯「袋住先」喎。
另一方面，立法會尋日成立有關創科局擬議決議案小組委員會，今次加入小組嘅建制派議員得番兩個，但泛民議員就有成六個咁多，睇怕創科局可能會再度胎死腹中，到時Charles可能再次被批評冇盡力阻止泛民「拉布」，甚至被批評政治凌駕業界利益。
卓妮