政情：中環出更：茅台之友 酒墨慶春
中華民族飲酒文化源遠流長，君不見古代騷人墨客，幾杯落肚詩意更濃。香港國酒茅台之友協會（協會）早前舉行春茗，身兼協會總監嘅福建書畫研究會創會會長施子清特意搵來三位書法家，即席揮毫寫大字迎春，在墨香及酒香交融下，更添幾分雅韻。唔知寫得一手好字嘅施子清，係咪飲幾杯後寫得更加行雲流水？佢聽完笑笑口話係飲咗茶、食咗個包至真。
唔止施子清有雅興，金銀業貿易場前理事長李德麟亦深被吸引，佇足欣賞幾位大師揮毫，似足小粉絲。
施子清徒弟揮毫助興
施子清話，今次係首次搵書法高手來寫字助興，藉此增加文化氣氛。卓妮見佢企喺其中一位高手楊煌身旁細心欣賞，原來楊係佢嘅徒弟，難怪佢愈睇愈滿意喇！
施子清細仔百仁基金前主席施榮忻（Jaime）亦有到場，近期有關青年事務委員會主席陳振彬嘅繼任人選眾說紛紜，身為委員會成員嘅Jaime亦係傳聞人選之一。不過，Jaime謙稱自己未夠班，至今亦未有人接觸過佢。佢話呢個職位好重要，唔係做過青年組織頭領就可以勝任，況且委員會內仲有好多人叻過佢，所以仲未知真命天子係邊個喎！
當晚現身暢飲嘅仲有協會監事長楊孫西及兒子楊華勇、協會青委主任莊家彬等人。保良局前主席鄭錦鐘及現任副主席陳細潔（Abbie）都喺度，講起金管局收緊按揭遏止炒風，Abbie拍手贊成，認為若政府唔做啲嘢，樓價升勢就停唔到，相信此舉可令炒家收歛咁話。
卓妮